Leeus kry oud-Matie om op slot uit te help

Die Leeus het hulle tot Engelse klubrugby gewend om ’n oplossing vir hul kommerwekkende diepte op slot te vind en Wilhelm van der Sluys daar opgeraap.

Die oud-Matie sal hom op 1 Maart van die klubspan Exeter Chiefs af vir die volgende twee jaar by die Leeus aansluit.

Swys de Bruin-hulle moes noodgedwonge oorsee vir ’n plaasvervangerspeler kyk nadat Lourens Erasmus met ’n beenbesering van Japan af teruggekeer het. Hy sal die hele Superreeks misloop.

Onsekerheid bestaan ook nog oor sy toekoms daarna, aangesien sy Japanse klub Docomo Red Hurricanes hom op ’n heeltydse grondslag wil kontrakteer.

Die Leeus en Andries Ferreira kon intussen nog nie ’n ooreenkoms vir die Superreeks bereik nie. Dit is onseker of hy wel Superrugby vir hulle sal speel.

Die 27-jarige Van der Sluys, wat in die Hoër Jongenskool Paarl op skool was, het vroeër in sy loopbaan vir die Westelike Provinsie uitgedraf. Hy het die Streeptruie ook op Cravenweek-, o.19- en o.21-vlak verteenwoordig.

As ’n senior het hy onder meer vir spanne soos Worcester Warriors en die Kings gespeel. Dit was juis by die Kings waar Exeter Chiefs hom raakgesien het.

Afgesien van Van der Sluys, sal die Leeus uit Marvin Orie, Stephan Lewies, Ruan Vermaak en Rhyno Herbst op slot kan kies.

In Franco Mostert se afwesigheid sal die Superreeks nietemin ’n groot toets vir die Leeus se diepte op slot wees met Mostert wat deesdae vir die Engelse klubspan Gloucester speel. Lewies is vroeër deur die Leeus as Mostert se plaasvervanger vir die Superreeks bekom. Lewies sal hom daarna by die Engelse klubspan Harlequins aansluit.

De Bruin se span kom Saterdag in Estadio José Amalfitani teen die Jaguares te staan.

Die Leeus was lank Suid-Afrika se vlagdraer in die Superreeks, maar ’n groot toets wag vanjaar op dié span met talle van sy staatmakers wat oorsee speel.