Leeus het Cyle dringend nodig

Message Topic Search Topic Options Post Reply Create New Topic Printable Version Translate Topic

   https://www.netwerk24.com/Sport/Rugby/Super-Rugby/leeus-het-cyle-dringend-nodig-20190305

Nadat hulle Saterdag voorlangs van die veld gevee is, kan die Leeus sekerlik nie meer wag dat Cyle Brink van sy skouerbesering herstel nie.

Dit is nog nie duidelik of Brink gereed sal wees om die Jaguares Saterdag op Ellispark te pak nie, maar wat wél duidelik is, is dat die Leeus ’n sterk baldraer of twee in die agttal makeer.

Die Bulle het hulle Saterdag hul eerste loesing in vier jaar en 15 wedstryde teen ’n Suid-Afrikaanse span op Ellispark toegedien. Onderweg na hul sege van 30-12, het die Bulle die Leeus fisiek oorheers.

Die Leeus se lostrio van Marnus Schoeman, Kwagga Smith en Hacjivah Dayimani is beweeglik, maar het nie veel van ’n fisieke teenwoordigheid nie. Dít het Brink in oormaat. Al 113 kilogram van hom.

“Cyle sal nog so twee weke uit wees, dink ek,” het Philip Lemmer, die Leeus se voorspeler-afrigter, verlede Dinsdag gesê.

Die Leeus kon nie Maandag of Dinsdag meer besonderhede oor hul beseerdes verskaf nie, maar as die prognose nog nie verander het nie, behoort Brink volgende week gereed te wees om die Rebels te pak.

“Cyle was reusagtig vir ons verlede jaar; dit gaan wonderlik wees om hom terug te hê.

“Maar ons soek die régte Cyle terug, ons soek hom op 100%. Dit is nog ’n lang seisoen en ons wil nie met hom waag en hom dan weer aan ’n besering afstaan nie.

“Ons is baie opgewonde en dit is goed om hom elke dag te sien oefen. Hy gee 100% met alles wat hy doen, so dit gaan groot wees wanneer hy terugkom,” het Lemmer gesê.

Cyle was reusagtig vir ons verlede jaar; dit gaan wonderlik wees om hom terug te hê.

Brink (25) het verlede jaar geskitter in die Superrugby-reeks en selfs die aandag van die Springbok-breier, Rassie Erasmus, getrek.

Twee beserings op ongeleë tye het hom daarvan weerhou om sy Bok-buiging in 2018 te maak.

Erasmus sou hom by die groep vir die vier toetse in Junie (een teen Wallis, drie teen Engeland) insluit, maar Brink het kort voor die toetstyd ’n skouerbesering opgedoen.

Hy het sy fiksheid herwin en was deel van die Leeus se opmars in die uitspeelwedstryde. Brink is toe by die groep vir die Rugbykampioenskapsreeks ingesluit en sou waarskynlik sy Bok-buiging in die wegtoets teen Argentinië maak.

Toe beseer hy sy knie by ’n Bok-oefening in Durban en sedertdien het hy nog nie weer gespeel nie.

Die Leeus makeer ’n groot baldraer om hulle oor die voordeellyn te kry. Die losvoorspelers wat in die beginspan teen die Bulle was, is almal ligter as 100 kg.

Brink mag dalk net die doepa wees om die Gautengers weer te laat brul. As hulle ’n bietjie voorvoet-besit kan bewerkstellig, sal die agterlyn ook weer drieë druk.