Stormers: G’n verskonings, maar ...

Die Stormers het dit nie as ’n verskoning voorgehou vir hul loesing teen die Bulle nie, maar op ’n Blou Maandag wel by monde van Dillyn Leyds erken dat die laat aankoms by Loftus Versfeld Saterdag ’n groot ontwrigting was.

’n Verkeersknoop – glo deur ’n ongeluk veroorsaak – was die oorsaak van dié gemors en die Kapenaars het gevolglik min tyd gehad om soos gebruiklik voor die afskop van wedstryde binne die stadion deur hul passies te gaan en ordentlik op te warm.

Hulle was, om die minste te sê, yskoud in die vernederende loesing van 40-3 wat ’n witwarm Bulle-span hulle toegedien het.

“Van die ouens het op die bus hul fone uitgehaal en met Google Maps probeer bereken hoe laat ons by die stadion gaan aankom. Dit het in ’n tydstip gelyk asof dit halfses gaan wees (die geskeduleerde afskoptyd was 17:15).

“Ons kon met die hulp van die polisie en verkeersbeamptes vinniger daar uitkom, maar dit was baie ontwrigtend. Ons tyd om op te warm is drasties beperk. Ek hou daarvan om ’n bietjie rond te stap en die toestande op te som – of daar ’n windjie is en hoe ons met ons skopwerk kan aanval. Daarvoor was daar glad nie tyd nie.

“Die groot ouens neem ook langer om hul verbande en kleeflint aan te bring en het een vir een aangesluit terwyl ander hanteeroefeninge gedoen het. Ons het ons bene gerek en ’n bietjie gedraf voor die afskop. Dit was seker hoe dit in die 1970’s gedoen is.”

Ons kon met die hulp van die polisie en verkeersbeamptes vinniger daar uitkom, maar dit was baie ontwrigtend.

Leyds erken ook dat die kleitrappery op Loftus nie ’n regstreekse gevolg van die verkeersontwrigting was nie.

“Ons vertoning het niks daarmee te make gehad nie. Ons was steeds ontspanne op pad stadion toe en het ’n plan gehad. Daar was onvoorsiene omstandighede, maar dis buite ons beheer. Wat op die veld gebeur het, was binne ons beheer en ons het dáár die pad byster geraak.”

Leyds hoop die nederlaag teen die Bulle het nie hul ondersteuners se entoesiasme gedemp nie, want die Stormers het hulle nodig vir Saterdag se kragmeting met die Leeus op Nuweland.

“Die Leeus is steeds Suid-Afrika se beste span. Hulle het ’n paar groot name verloor, maar het steeds kwaliteitspelers. Hulle het ’n puik agterlyn met ’n speler van Ruan Combrinck se kaliber op die plaasvervangersbank en dan is daar daai groot voorspelers wat op jou afpyl,” sê Leyds.

“Hopelik loop Boundaryweg oor van die mense wanneer ons bus voor die stadion stilhou. ’n Wedstryd op Nuweland teen ’n goeie Leeus-span is die perfekte geleentheid om te wys wat in ons steek.”