Bulle verras met Blitsbok op binnesenter

Daar is tien Springbokke en ’n klompie Blitsbokke in die Bulle se beginspan vir Saterdag se opwarmstryd teen die Haaie in Ballito.

Pote Human, die Bulle se hoofafrigter, het ’n span gekies wat in alle waarskynlikheid nie veel sal verskil van volgende week se opdrafspan vir die Superrugby-stryd teen die Stormers op Loftus Versfeld nie.

Jason Jenkins kry sy eerste kans nadat hy uit Japan teruggekeer het en is die kaptein, Lood de Jager, se slotmaat.

Human het verras deur Dylan Sage, die Suid-Afrikaanse Rugbyunie (Saru) se Sewesspeler van die Jaar, op binnesenter te kies. Sage word eerder as ’n buitesenter beskou.

Rosko Specman, nog een van die Blitsbokke se uitblinkers in die 2017/2018-seisoen, is op linkervleuel gekies. Cornal Hendricks, ook ’n voormalige Blitsbok, sal op regtervleuel kans kry teen die Haaie.

“Ons het verlede naweek (teen die Stormers in Kaapstad) goeie tekens gewys en ek wil hê ons moet Saterdag teen ’n goeie Haaie-span daarop verbeter.

“Ek wil hê die spelers moet vir my wys hoe graag hulle in die beginspan wil wees aanstaande Saterdag,” het Human gesê.

* Bulle: Warrick Gelant, Cornal Hendricks, Jesse Kriel, Dylan Sage, Rosko Specman, Handré Pollard, Embrose Papier, Duane Vermeulen, Thembelani Bholi, Ruan Steenkamp, Lood de Jager (k), Jason Jenkins, Trevor Nyakane, Schalk Brits, Lizo Gqoboka. PLAASVERVANGERS: Johan Grobbelaar, Matthys Basson, Conraad van Vuuren, Hanro Liebenberg, Paul Schoeman, Jannes Kirsten, Tim Agaba, André Warner, JT Jackson, Jade Stighling, Divan Rossouw.