Die SuperSport-uitdaagreeks sal volgende jaar nog voortgaan, maar moontlik net as ’n amateurkompetisie wat in 2021 afgelas kan word.

Volgens Rapport se inligting het SA Rugby die afgelope week die onderskeie provinsies ingelig dat die SuperSport-uitdaagreeks volgende jaar sal voortgaan, omdat daar nog ’n jaar van die kontrak met die TV-uitsaaier oor is. Oor die samestelling van die kompetisie is daar egter nog nie duidelikheid nie.

Met die aanvaarding van die nuwe kontrakteringstelsel, met franchises wat net 45 senior spelers mag kontrakteer en beperk is tot R10 miljoen vir junior spelers, is dit vir veral franchises moeilik om tydens die Superreeks twee afsonderlike spanne op die veld te sit.

Baie van die franchises moet spelers afstaan aan die Varsitybeker, terwyl die sogenaamde kleiner unies reeds baie aan sy spelerskorps moes sny weens ’n verminderde toelae.

Die nuwe kontrakteringsmodel vereis dat kleiner unies net 23 spelers mag kontrakteer, met ’n spelersbegroting van net R6 miljoen. Die 920 beroepspelers wat die land tans het, sal met meer as die helfte verminder.

Met dit in gedagte het ’n paar kleiner unies aanvaar hulle sal klub- en amateurspelers in die SuperSport-kompetisie moet gebruik. Die Boland en Griffons, wat spelers tans net vir agt maande van die jaar kontrakteer, het reeds gesê dat dít hul plan vir volgende jaar is.

Een rugbyadministrateur het aan Rapport gesê dit is net ’n kwessie van tyd voordat die kompetisie “volkome amateur” word.

“Super-spanne het ’n kompetisie nodig waarin hulle beseerde spelers kan laat speel voordat hulle weer in die Superreeks speel, soos wat Warren Whiteley gedoen het. Dit is ongelooflik belangrik om die SuperSport-kompetisie met ’n professionele span te speel. As dit verander, waar speel daardie spelers dan?”