By die Leeus het Carlu Sadie straks ’n bondgenoot en leermeester gevind wat hom kan help om groot hoogtes te bereik.

Dié 21-jarige vaskopstut en Julian Redelinghuys, die Leeus se skrumafrigter en voormalige Bok-stut, het ’n baie hegte band gevorm sedert Sadie hom onlangs van die Kaap af in Johannesburg gevestig het.

Sadie was Saterdag skitterend in die Leeus se Superrugby-sege van 25 – 16 oor die Jaguares in Buenos Aires. Hy was nie net rotsvas in die skrums nie, hy het ook drie balle by die afbreekpunte gegaps.

“Ek het Carlu glad nie geken voordat hy hom hier aangesluit het nie, maar ek is bitter beïndruk met hom,” sê Redelinghuys.

“By die Leeus wil ons graag goeie mense hê, want goeie mense maak goeie rugbyspelers. Carlu is ’n lekker ou, ’n lekker proppie en ons het reeds baie goeie vriende geword.

“Hy is nog jonk en hy het baie om te leer, maar hy is bitter ontvanklik vir raad en kennis. Hy is ’n goeie ou en ek voorspel ’n baie blink toekoms vir hom.”

Redelinghuys was in sy noppies met Sadie se vertoning Saterdag in Buenos Aires.

“Ek is vrek trots op hom. Hy is ’n uitstekende skrumwerker en dit is nie aldag dat ’n vaskop drie keer omgekeerde besit by die afbreekpunte bewerkstellig nie,” sê Redelinghuys.

“Tog moet die ouens rondom hom ook krediet kry, want sonder hulle sou hy niks kon uitrig nie. Ons het nie ’n swaar pak nie – ek dink die Jaguares s’n was 70 kg swaarder as ons. Dit maak eintlik nie sin dat jy ’n pak wat soveel swaarder is, kan terugstoot nie. Maar as jy saamwerk en dinge as ’n eenheid doen, is dit moontlik.

“Ons het ’n baie beweeglike pak en dit pas ons, want ons wil graag met die bal hardloop.”

Sadie het op sy beurt ’n ewe hoë dunk van Redelinghuys. Hy het vroeër vandeesmaand met die grootste lof van dié voormalige Bok gepraat.

“Hy is wonderlik. Hy het my nie net geleer van speel nie, maar van die lewe ook,” sê Sadie.

“Die ervaring wat hy bied, is ongelooflik. Om na hom te luister, om saam met hom te stap en te weet waardeur hy was, is ’n groot voorreg.

“Om hom te groet elke dag, is reeds ’n groot eer.”

Redelinghuys moes sy loopbaan twee jaar gelede voortydig kortknip nadat hy sy nek in die Curriebeker-halfeindstryd in 2016 teen die Vrystaat gebreek het.

“Ek het altyd opgesien na hom, want mense het hom onderskat en hy het gewys dinamiet kom in klein pakkies.”

Sadie, ’n leenspeler van die Westelike Provinsie, kom Saterdag teen van sy oudspanmaats te staan wanneer die Leeus die Stormers op Nuweland pak.

Redelinghuys sê die Kapenaars sal gretig wees om terug te slaan ná hul drag slae van 40 – 3 teen die Bulle.

“Hulle gaan beslis iets hê om te bewys. Dit is altyd taai in die Kaap, maar ons hou van taai wedstryde,” sê Redelinghuys.