Hy is mal daaroor om met die “weggooikinders” van ander unies te werk, sê Swys de Bruin, die hoofafrigter van die Leeus se rugbyspan.
“Wanneer jy in iemand glo, is dit verbasend wat jy met hulle kan regkry,” sê De Bruin van die onbesonge spelers wat hy ontwikkel.
“Dit is die suksesresep wat ons die laaste klompie jare hier by die Leeus gevolg het. Ons het nie groot name aangeskaf nie, maar dit was meestal spelers wat agter in die tou gestaan het by hul onderskeie unies en toe hier groot name geword het met die kanse wat hulle gegun is,” vertel hy.
De Bruin erken hy is realisties oor sy span se situasie met verskeie gevestigde spelers wat nou oorsee speel en dat daar weer tot ’n mate gebou moet word met ’n rits jong spelers.
“Eerstens is dit nodig dat die jong spelers ons kultuur moet verstaan en daarby inpas. Ons gaan hou by dit wat in die verlede vir ons gewerk het en ek sal nie veel verander aan hoe ons speel nie.”
Die een spel-afdeling wat De Bruin egter uitlig as een wat vanjaar dramaties moet verbeter, is hul verdediging. Die Leeus het in 2018 die naasmeeste drieë gedruk (89), maar was ook een van die spanne in Superrugby wat die meeste kere agter hul eie doellyn gestaan het (65).
Slegs die Sunwolves (99), Bulle, Blues en Reds (almal 66) het meer drieë afgestaan.
“Joey (Mongalo, die verdedigingsafrigter) het baie hard gewerk om ’n stelsel te kry wat vir ons gaan werk en ek glo daardie harde werk gaan vir ons sukses bring,” sê De Bruin.
“Soos sake staan in hierdie Wêreldbeker-jaar en met van die Springbokke wat genoeg ruskans moet kry, sal ons behoorlik gebruik moet maak van ons groep en spelers afwissel.
“Ons word in verskeie kringe nie veel van ’n kans gegee om weer hier plaaslik bo uit te kom nie, maar dit was verlede seisoen ook die geval toe ons ’n nuwe afrigtingspan ingebring het. Mense kan ons maar afskryf as hulle wil, maar ons is vasbeslote en oorgehaal om hulle verkeerd te bewys.
“Ons doen dinge op ons manier en glo in mekaar en dit is baie belangrik,” sê hy.
Tog verwag De Bruin hierdie seisoen ’n kwaai aanslag van veral die ander Suid-Afrikaanse spanne.
“Sjoe, die Bulle lyk veral besonder sterk. Dit lyk my dinge gebeur daar op Loftus en hulle gaan hierdie seisoen ’n heeltemal ander dierasie wees.
“Die Haaie het momentum wat hulle oordra vanaf die Curriebeker-reeks en die Stormers is veral voorlangs baie sterk. Hulle het omtrent ’n dosyn Springbokke waaruit hulle kan kies vir hul agttal,” sê De Bruin.
Die Leeus speel Saterdag op Loftus ’n opwarmingswedstryd teen die Bulle en De Bruin sê hy sal die meeste van sy gevestigde spelers ruskans gee vir daardie stryd en grootliks gebruik maak van die jong talent in sy groep en hulle die kans gee om vroeg hul stempel af te druk.