Die terugslae wat hy in die afgelope drie seisoene beleef het, het hom geestelik sterker gemaak.
Só sê die Leeus se loskopstut Dylan Smith, wat eersdaags ná ’n afwesigheid van ses maande weens ’n skouerbesering terugkeer.
Die 24-jarige oud-leerling van die King Edward School (KES) in Johannesburg, waar hy saam met Malcolm Marx en Cyle Brink gespeel het, het die afgelope paar jaar heelwat beserings opgedoen, maar hy is oorgehaal om weer te begin speel.
Smith wat waarskynlik nog so twee tot drie weke buite aksie sal wees, behoort vir die openingswedstryd in die Superrugbyreeks reg te wees.
“Ek voel meer voorbereid as ooit tevore,” sê Smith. “Hierdie Superseisoen beloof om baie opwindend te wees en ek beskou dit as ’n groot uitdaging.
“Ná alles wat ek deurgemaak het die laaste paar jaar en hoeveel kere my rugbyloopbaan al ontwrig is, voel ek dat ek myself iets goeds skuld.
“Ek wil graag weer wys waartoe ek in staat is en vertrou dat my rugbyloopbaan nou behoorlik kan vlamvat,” sê Smith, wat enkele jare gelede as van die opwindendste jong voorrymanne in die land beskou is en vir wie ’n groot toekoms voorspel is.
“Ek voel soos ’n vonkelwynprop wat net wag om uit te skiet,” sê hy.
Smith reken ook diegene wat meen dat die Leeus se agttal kwesbaar sal wees noudat Ruan Dreyer, Jacques van Rooyen, Franco Mostert en Jaco Kriel nie daar is nie, moet wéér dink.
“Spanne wat glo hulle sal nou voorlangs net oor ons kan loop, gaan ’n verrassing kry,” sê Smith.
Rob Collins, die Leeus se spandokter, glo Smith behoort al vandeesweek weer voluit aan die oefeninge te kan deelneem.
Volgens Collins is daar vanjaar meer beserings as wat daar aan die begin van verlede seisoen was.
Die slot Andries Ferreira, wat weens ’n besering die hele Curriebeker-reeks misgeloop het, is nog nie in aksie nie, al is hy weer fiks, aangesien daar nog kontraktuele sake is wat eers uit die weg geruim moet word.
Brink sal glo ook volgens Collins eers teen die tweede of derde wedstryd van die seisoen kan inval, terwyl nóg ’n slot, Lourens Erasmus, eers teen die middel van die jaar weer sal kan speel.
Ander spelers wat nog met beserings sukkel en wisselend van die tweede week tot eers April in aksie sal kan wees, is Ross Cronjé, Len Massyn en Lionel Mapoe.