Hy is nog nie lank by Loftus Versfeld nie, maar is al ’n paar keer “oom” genoem.

Dit was verlede seisoen by die Springbokke ook die geval en hy sal seker nou daaraan gewoond moet raak, sê Schalk Brits met ’n groot glimlag.

Jy kan die jonger manne wat die nodige respek teenoor dié veteraan-haker betoon seker nie verkwalik nie.

Hy word immers 38 in Mei.

“Dit is eintlik baie snaaks. Ek het nooit in my wildste drome gedink ek gaan nog op my ouderdom rugby speel nie.

“Ek het my eerste kontrak as ’n beroepspeler in 1999 gekry en van die spelers (by die Bulle en Bokke) het in 2015 en 2016 matriek geskryf.”

Maar nee, hy het nie Pretoria toe gekom om sy rugbypensioen aan te vul nie. Hy wil speel en ’n bate wees vir die Bulle, verseker Brits.

“My doel is nie net om te speel nie, maar ook om my kennis te deel.

“Ek kom met geen verwagtinge dat ek gekies moet word nie. Ek wil dit geniet en waarde toevoeg.

“As ek gekies word verwag ek dat hulle (die ander hakers in die groep) my sal ondersteun en as hulle speel sal hul my ondersteuning kry.

“As die Bulle uiteindelik suksesvol is, is al die spelers ook suksesvol. Ek het eers later in my loopbaan geleer om ’n ware spanman te wees.

“Jy is redelik selfsugtig as jy jonk is en ek het eers later geleer dat daar ’n groter prentjie is.”

Brits sê dit is “fantasties” om ’n Bul te wees.

“Van die spelers tot die afrigtingspan, daar word ongelooflik hard gewerk en daar is ’n lekker gees.

“Die fiksheid op die eerste dag is iets waaraan ek nie gewoond is nie.

“Die weer is belaglik (lekker). Hier staan ek kaalvoet met ’n kortbroek. Ek het reeds vir Schalk Burger (wat saam met Brits vir Saracens gespeel het) ’n SMS gestuur. Hulle is in die reën en dit is yskoud daar (in Londen). Ek geniet die weer baie.”

Brits benadruk hy het geen kwade gevoelens jeens die Stormers nadat dié franchise aan die einde van verlede jaar koue voete gekry het nadat hy hom reeds tot die Kaapse span verbind het nie.

“Dit is lekker om by ’n plek te wees waar hulle jou soek. Die Stormers het hulle probleme en ek is bly om hier te wees.

“Ek is by ’n unie wat nie net mededingend wil wees nie, maar iets wil wen.”

Brits sê hy is uitgerus en is opgewonde oor die vooruitsig om weer Superrugby te speel – iets wat hom in 2011 laas beskore was.

“Ek is verskriklik opgewonde. Ek glo dit gaan ’n aanpassing wees om weer Superrugby te speel en ek sal weer gewoond moet raak daaraan.

“Eintlik pas dit my om in die Suidelike Halfrond te speel.”