Die Hurricanes verwag hul nuwe Suid-Afrikaanse slot-aanwins sal ’n fisieke bydrae lewer tot die aanslag van hul pak voorspelers.

Stuff berig die Nieu-Seelandse franchise het Maandag bevestig die voormalige Leeus-slot Andries Ferreira is vir die res van die Superrugby-seisoen vir hulle beskikbaar.

Ferreira (28) het Saterdag in Wellington aangeland om Sam Lousi te vervang. Lousi het ’n ernstige borsspierbesering opgedoen en sal nie vanjaar weer Superrugby speel nie.

Ferreira het vir die Cheetahs en die Leeus gespeel, terwyl hy ook vir ’n wyle vir Toulon in die Franse Top14-liga uitgedraf het.

Die Hurricanes-hulpafrigter Carlos Spencer, wat betrokke was by die Leeus as speler en afrigter, sê Ferreira sal ’n fisieke teenwoordigheid aan die pak voorspelers verleen.

“Hy is ’n soliede seun en vanweë sy ervaring saam met die Leeus, is hy ’n lekker fisieke speler,” sê die legendariese All Black-losskakel.

“Hy hou daarvan om die bal te dra. Hy is goed in die vaste fasette en dit is wat ons benodig.

“Ons het ’n klompie beserings op slot, so om hom in te bring om ons daar te versterk is vir seker ’n bonus.”

John Plumtree, hoofafrigter, sê hy is verheug dat Ferreira die Hurricanes se uitnodiging aanvaar het.

“Ek het baie respek vir die wyse waarop Andries speel en die spel benader en ons glo hy gaan ’n groot bate vir die span wees,” sê die voormalige breier van die Haaie.

“Ons glo Andries bring regte ervaring saam met hom en hy sal die jong spelers rondom hom help ontwikkel.”

Ferreira se kontrak by die Leeus het onlangs verstryk, hoewel die Johannesburgers net daarby sou baat om sy dienste te behou.