Nadat hy sy diepte in die Leeus se eerste opwarmwedstryd teen die Bulle op die proef gestel het, het Swys de Bruin, soos verwag, besluit om sy strydrosse Sondag in die Kaapstad-stadion teen die Haaie los te laat.

Die Leeus se breier het verskeie staatmakers, wat nie teen die Bulle in aksie was nie, by sy beginspan vir dié litte-losmaker ingesluit.

Die Springbok-agtsteman Warren Whiteley sal die span op “Superheld-Sondag” op die veld lei. Hy vorm ’n lostrio saam met Hacjivah Dayimani en Kwagga Smith.

Malcolm Marx is terug op haker en sal tussen Dylan Smith en die nuwe aanwins van die Kaap, Carlu Sadie, sak.

Elton Jantjies sal die toutjies in die nr. 10-trui trek. Hy vorm ’n skakelpaar met Nic Groom.

De Bruin het ’n agterste driehoek wat uit Springbokke bestaan – Aphiwe Dyantyi, Courtnall Skosan en Andries Coetzee – gekies.

Harold Vorster en Lionel Mapoe sal die middelveld beman.

Andries Coetzee, Courtnall Skosan, Lionel Mapoe, Harold Vorster, Aphiwe Dyantyi, Elton Jantjies, Nic Groom, Warren Whiteley (k), Hacjivah Dayimani, Kwagga Smith, Marvin Orie, Ruan Vermaak, Carlu Sadie, Malcolm Marx, Dylan Smith. PLAASVERVANGERS: Pieter Jansen, Danie Minnie, Frans van Wyk, Jacobie Adriaanse, Marnus Schoeman, Dillon Smith, Shaun Reynolds, Sylvian Mahuza, Ruan Combrinck, Vincent Tshituka, Rhyno Herbst.