Pote nou in binnebaan om Bulle te brei

Message Topic Search Topic Options Post Reply Create New Topic Printable Version Translate Topic

   https://www.netwerk24.com/Sport/Rugby/pote-nou-in-binnebaan-om-bulle-te-brei-20181210
Die soektog na die regte man om die Bulle in aanstaande jaar se Superrugby-reeks te brei, is uiteindelik verby.

’n Aankondiging word Dinsdagoggend om 11:00 deur die Blou Bulle Maatskappy (BBM) gemaak en die verwagting is dat dit Pote Human te beurt gaan val.

Victor Matfield, wat die gunsteling was, het luidens ’n berig deur Rapport weens sy gesinverpligtinge en die langtermyn-sekuriteit wat hy as spesialis-ontleder by SuperSport het sy neus vir die pos opgetrek.

Volgens die berig sou daar gepoog word om Matfield te kry om van besluit te verander, maar gissinge in Suid-Afrikaanse rugby is dat hy uit die prentjie is.

Dis nou tensy die BBM sy geheim baie goed bewaar.

Deon Davids, die Southern Kings se afrigter, was die ander sterk kandidaat, maar is nie meer in die prentjie nie.

Met die aanstel van Human sal die Bulle die voordeel van kontinuïteit hê. Hy het die Blou Bulle in vanjaar se Curriebeker-reeks afgerig en hulle het die WP byna teen die verwagting in die halfeindronde op Nuweland geklop.

Die feit dat die Bulle glo nie hul verkose kandidaat kon kry om vir John Mitchell op te volg nie sal tog as ’n groot teleurstelling beskou word. Daar word groot beleggings gemaak om die franchise weer Suid-Afrika se toonaangewende span te maak en die afrigter sal uiteraard ’n deurslaggewende rol daarin moet speel.

Die Bulle het reeds spelers soos Duane Vermeulen, Schalk Brits en Rosko Specman vir aanstaande jaar se Superreeks gewerf. Daar is sprake dat daar nog aanwinste gaan wees. Selfs Willie le Roux, wat vir die Engelse klub Wasps speel, se naam het al as ’n moontlike aanwins opgeduik.

Wasps, wat finansiële probleme het en ook gefrustreerd is met Le Roux se gereelde internasionale verpligtinge, is glo gretig om die Springbok-heelagter van sy boeke af te kry.

Die Bulle gaan ook ’n aansienlike inspuiting intellektuele kapitaal kry met die Bok-afrigter, Rassie Erasmus, en sy verdedigingsafrigter, Jacques Nienaber, wat glo met die span se voorbereiding vir aanstaande jaar se Superreeks gaan help.

Daarmee saam het Rapport berig dat die voormalige Blou Bul-speler en afrigter van die Westelike Provinsie, Alan Zondagh, die unie se direkteur van rugby gaan word.

Die BBM het ook die sakeman Alfons Meyer aangestel om vir Barend van Graan as sy uitvoerende hoof op te volg. Meyer is deur die sakereus Remgro gevra om hom vir die pos beskikbaar te stel. Remgro het ’n aandeel van 50% in die BBM. Zondagh het ook noue bande met Remgro.