Haai-slot moet Mostert se plek in Leeu-agttal vul

Die Leeus het Stephan Lewies as ’n versekeringspolis vir Franco Mostert uitgeneem ná die Bok-slot se vertrek Engeland toe.

Lewies sal met sy terugkeer uit Japan, waar hy klubrugby vir Kamaishi Seawaves speel, in die Superreeks vir Swys de Bruin se span beskikbaar wees. Daarna kan hy soos Mostert sy loopbaan by ’n Engelse klubspan voortsit met Harlequins wat hoop om die 26-jarige slot te kontrakteer.

Lewies se vertrek is ’n slag vir die Haaie, maar Ruan Botha het hom die afgelope tyd as die Durbaniete se eerstekeuse-vyfslot gevestig.

Die Haaie het ook die Bulle se Ruben van Heerden gekontrakteer.

In Johannesburg kan Lewies met ’n tikkie geluk reguit in die beginspan instap.

Hy en nog ’n Springbok, Marvin Orie, kan selfs met tye die slotpaar vorm.

Andries Ferreira, nog ’n sterk aanspraakmaker op ’n plek in die beginspan én ’n jarelange staatmaker vir die Leeus, sal eers binne die volgende week of twee mediese toetse moet slaag voordat hy sy kontrak met die Leeus verleng. Hy en die Leeus praat wel al oor ’n moontlike verlenging.

’n Groot bekommernis vir die Leeus is dat nog een van hul slotte, Lourens Erasmus, sy enkel gebreek het. Onsekerheid bestaan of hy vir die Superreeks beskikbaar is.

’n Speler soos die 22-jarige Rhyno Herbst bied die Leeus wel diepte op slot.

Ja almal kyk in geld vas, maar ons weet dat die media nie die volle waarheid sal vertel ivm. spelers se besluite om hulle en hulle families hier weg te kry nie