Willie in wildernis, maar wil steeds in WB speel

Die vuurvreter-losvoorspeler Willie Britz, wat die afgelope drie jaar klubrugby in Japan speel, sal nie vanjaar in die Superrugby-reeks in aksie gesien word nie.

Britz (30) het nie weer ’n kontrak by die Sunwolves gekry nie, maar het nog nie die hoop laat vaar dat hy wel nog vanjaar vir Japan in die Wêreldbeker-toernooi daar kan uitdraf nie.

Hy span tans by sy ouers in Suid-Afrika uit en dan wil hy die land platreis om vriende te besoek.

Britz kwalifiseer in Julie om vir Japan te speel en hy sê hy sal gereed wees as hy betrek word.

Met dié dat hy nie ’n Superrugby-kontrak het nie, kan daar seker gewonder word of Britz hom nie dalk in die rugby-wildernis bevind, met die WB-toernooi net bietjie meer as sewe maande weg nie.

Ander Suid-Afrikaners wat onlangs in die Japanse Wêreldbeker-oefengroep ingesluit is, is die losvoorspeler Wimpie van der Walt (DoCoMo Red Hurricanes), die flank Lappies Labuschagne (Kubota Spears) en nog ’n veelsydige voorspeler, Grant Hattingh (Kobelco Steelers).

Jurgen Visser (Kamaishi Seawaves), ’n voormalige heelagter van die Bulle, staan ook nog in die ry vir ’n plek in die nasionale span.

Nog ’n Suid-Afrikaner van geboorte wat ook vroeër sy buiging vir Japan gemaak het, is die veelsydige agterspeler Kotaro Matsushima van die Suntory Sungoliath.

“Ek het mos nie weer ’n kontrak by die Sunwolves gekry nie, so ek speel nie vanjaar Superrugby nie. Ek hou nou ’n bietjie vakansie,” het Britz vanaf die Vaaldam laat weet.

Oor die moontlikheid om vir Japan te speel in sekerlik die belangrikste jaar van sy rugbyloopbaan, bly Britz positief.

“Ek het nog niks gehoor (van die Japanse Rugbyunie) nie. Sover is net Lappies, Wimpie en Grant in, maar die groep kan nog baie verander so ek byt maar vas,” sê Britz.

Hy speel sy klubrugby vir die Shining Arcs in Japan en die Japanse Topliga-seisoen het onlangs klaargemaak. Spelers kry tans ’n blaaskans voordat hulle in April weer inval.

“Ek bly positief oor my kanse om vir Japan te speel. Dit hang uiteraard ook van beserings aan ander spelers af of ek ’n kans sal kry. Dit hang ook af van hoe ek in die Topliga vertoon. Ek sal maar kyk wat volgende gebeur,” sê Britz.