Siya geveto, Stormers vou weer

Pieter-Steph du Toit wat ’n bal in die doodsnikke aanslaan, Siya Kolisi se gesag wat ondermyn word en SP Marais wat ’n verspot maklike strafdoel skeeftrek.

Is daar enigsins ’n beter versinnebeelding van die Stormers se Super-gekleitrappery teen Nieu-Seelandse spanne as dít?

Dalk tog: Met tien minute se speeltyd oor in gister se stryd teen die Blues in Auckland, was die Stormers met net 9-17 agter, in die Kiwi’s se gebied en voltallig teen 14 spelers. Die eindtelling? 24-9 in die Blues se guns.

Vir die ganse tien minute nadat die vleuel Tanielu Tele’a met ’n rooikaart van die veld is omdat hy Dillyn Leyds in die lug gespeel het, kon die Stormers nie deurkom nie.

In die 82ste minuut is hul aand opgesom toe Du Toit die bal ná ’n lynstaan aanslaan. Selfs met 14 spelers op die veld, kon die Blues ’n drie druk wat die sege beklink het.

Dit was ook nie net Du Toit se aanslaan wat die Stormers se powere pogings in Nieu-Seeland gister opgesom het nie.

Kort ná Tele’a se rooikaart, het die Stormers ’n goeie rolmaalbeweging van stapel gestuur wat tot nóg ’n strafskop gelei het – bykans reg voor die pale. Kolisi, die kaptein, wou weer kantlyn toe skop, maar sy besluit is uit die afrigtershokkie geveto en die skopkegel is op die veld gedra.

Die wyse waarop die kaptein se besluit verontagsaam is, moet reeds die rooi ligte laat flikker. Hy het selfs vir Marais aangejaag om die skop kantlyn toe te stuur, deur met sy vinger op sy gewrig te tik. Toe Marais boonop die strafdoel-poging vlak voor die pale skeeftrek, is die wind finaal uit die span se seile gehaal.

Kort daarna het Rieko Ioane aan die ander kant van die veld, tot die groot verligting van die tuisspan se ondersteuners, gaan druk om die wedstryd vir sy span te beklink.

Daar sal vandeesweek ernstige kajuitraad in die Stormers-kamp gehou moet word. Dit was hul 12de loesing op ’n streep in Kiwi-land met geen teken dat sake vinnig gaan verbeter nie.

Gister se wedstryd sou ’n galpil vir Stormers-ondersteuners wees nadat hulle vir byna die hele wedstryd in alle fasette oorheers het. Behalwe op die telbord.

Eben Etzebeth 8/10: Sonder hom in die span sukkel die Stormers maar. Die yster-slot het weer eens sy hart uitgespeel en homself op die aanval en verdediging laat geld. Hy stormram goed deur verdedigers en laat ook ’n paar Blues-baldraers hik. Maak ook ’n goeie duikslag wat ’n moontlike drie vir die Blues voorkom.

Patrick Tuipulotu 7/10: Een van sy span se voorste verdedigers in die stryd en sorg vir ’n paar harde duikslae. Sy keerwerk maak dat die Stormers se aanvallers nie veel beweegruimte kry nie. Het die bal ’n paar keer goed opgedra in kontak, maar maak minder impak met sy lopies as waaraan kykers al gewoond geraak het.

Die besoekers het vroeg ’n rits kanse geskep waarvan dadels gekom het. Van ’n aanslaan hier of twee woer-woer-aangeë daar, tot skoppe wat nooit geskop moet gewees het nie. Dit het die Kapenaars gekelder en die Blues vir die eerste halfuur in die stryd gehou.

Dis ook duidelik dat die Stormers-agterspelers vandeesweek deur Bafana Bafana se Afcon-kwalifikasie besiel is.

Hulle het die bal geskop asof dit ’n sokkerwedstryd was en dié swak skopopsies, nes verlede week teen die Hurricanes, is weer meesal deur Jean-Luc du Plessis, Stormers-losskakel, uitgevoer.

Sy binnesenter, Damian de Allende, het ook op ’n slag besluit ’n tikskoppie is ’n goeie opsie met verskeie spelers aan sy buitekant.

Damian de Allende 4/10: Vir ’n Springbok-senter maak hy ’n skoolseun-fout deur die Blues-vleuel Tanielu Tele’a hoog te probeer lak langs die kantlyn toe hy soos ’n vrot vel afgestamp is met die vleuel wat gaan druk het. Skop ook balbesit onnodig weg toe sy span goed op die aanval was. Sukkel ook om die bal oor die voordeellyn te dra met sy stormlopies.

Ma’a Nonu 7/10: Daar’s nog hope rugby in dié All Black-stormram. Hy hou die Stormers-verdedigers besig op die aanval en hardloop ’n paar keer sterk met die bal in kontak, wat sy span meters op die aanval besorg. Sy bresse wat hy slaan, was ook puik. Staan ook rotsvas op die verdediging en sorg dat die Stormers-agterlyn nie werklik aan die gang kon kom nie.

Dit het maar net weer balbesit aan die Blues besorg en die druk van hul verdediging afgehaal.

Gepraat van die Blues se verdediging. Dit was strykdeur rotsvas en hoewel daar hier en daar ’n verdediger was wat à la Richie McCaw met die onkantlyn flankeer het, het die Stormers nie gelyk of hulle punte via drieë gaan aanteken nie.

Die besoekers kon ook nie munt slaan uit die swak ingooiwerk by die lynstaan deur die Blues se James Parsons nie. Die tuisspan het ’n paar keer besit afgestaan, maar dit het nie juis ’n nadelige impak gehad nie.

Wat ’n mens meer oorbluf het, is waarom die Stormers nie hul rolmaal – ’n verwoestende wapen verlede Saterdag teen die Hurricanes – meer ingespan het nie.

Eben Etzebeth, Bongi Mbonambi en Du Toit was enduit krygers vir hul span.

Al drie het op die aanval gewoeker, terwyl Etzebeth ’n paar duikslae uitgevoer het wat sy span se bas gered het. Die heelagter, Willemse, en vleuel, Leyds, het agterlangs skerp met die bal in die hand gelyk.