As die Leeus self nie weet wat hulle hierdie naweek gaan opdis nie, hoe op aarde kan die Jaguares weet?

Met dié tong-in-die-kies-vraag het die Leeus-breier, Swys de Bruin, Donderdag die waaghalsigheid van sy spankeuse vir Saterdag se Superrugby-wedstryd teen die Argentyne op Ellispark te kenne gegee.

De Bruin het die snoeiskêr met oorgawe ingelê en sy hoop geplaas op die entoesiasme en energie van ’n groot groep jongelinge om die gety vir sy span te draai.

Daar is sewe veranderinge aan die Leeus se beginspan aangebring, asook ’n posisionele verandering.

In die nadraai van hul teleurstellende nederlaag teen die Bulle op Ellispark sal Ruan Combrinck, Lionel Mapoe, Aphiwe Dyantyi, Nic Groom, Hacjivah Dayimani, Sti Sithole en Robert Kruger almal Saterdag se katgeveg in die paviljoen moet gade slaan.

De Bruin het geweier om te sê spelers is gepos, maar hy het te kenne gegee dat sommige van die ongelukkiges se spelpeil nie tans na wens is nie.

“Daar is nie plek vir passasiers hier nie,” het hy gesê. “Ons het dit al aan die begin van die jaar duidelik gemaak dat elke ou die trui moet verdien. Dit maak nie saak wie jy is nie, daardie trui behoort nie onvoorwaardelik aan jou nie.

“Al die spelers is tevrede met die veranderinge wat gemaak is en ons is baie opgewonde om te sien hoe die jongelinge vaar.

“Dis ’n waagstuk, maar ek sal daarby staan en val dat hierdie jong outjies nog groot hoogtes sal bereik. As jy goed genoeg is, is jy oud genoeg – ek glo vas dis hier die geval.”

Die ingrypendste – en dapperste – verandering is in die middelveld, waar Wandisile Simelane en Franco Naudé die nuwe senterpaar is.

Tussen hulle het die twee nie eens ’n volle Superwedstryd agter die blad nie. Simelane se enigste 24 minute van Superrugby was drie weke gelede teen die Jaguares, terwyl Naudé in 2017 40 minute vir die Bulle teen die Sunwolves gespeel het.

Nietemin glo De Bruin en sy afrigterskorps die duo kan die poppe die naweek laat dans.

Simelane is ’n speler oor wie se doellynkoors daar geen twyfel is nie (sy ses drieë vir die jong Bokke by verlede jaar se Junior Wêreldbeker onderstreep dit).

En Naudé (wat deur die Bulle aan die Leeus geleen word) se entoesiasme op die oefenveld kon volgens De Bruin nie geïgnoreer word nie.

“Toe hy hier aankom, het hy dadelik sy hand opgesteek en baie energie na die oefeninge gebring,” het De Bruin van Naudé gesê. “Hy wíl speel.

“Ons het nou ’n geleentheid om te kyk na ’n senterpaar met die oog op die toekoms. Dink jou in hulle slaag die naweek die toets, hoeveel positiewes dit vir ons sal meebring.”

Die Leeus het ook albei hul vleuels verander, met Sylvian Mahuza in Combrinck se plek, en Courtnall Skosan in vir Dyantyi.

Volgens De Bruin het Dyantyi ’n seer knie, wat hom verhinder om sonder pyn te spring.

“Ons sou hom kon verbind en op die veld stuur, maar ons het besluit om eerder die kans aan te gryp om hom ’n ruskans te gee en aan sy selfvertroue te werk,” het De Bruin verduidelik.

Onder die voorspelers is daar drie veranderinge. Die slot Stephan Lewies skuif af na die bank om plek te maak vir Ruan Vermaak, Kwagga Smith neem by Dayimani oor op agtsteman en Vincent Tshituka vat die nr. 7-trui wat Smith laasweek gedra het.

Tshituka, wat 1,95 meter in sy sokkies staan en 93 kg weeg, kan dalk net die spierkrag verskaf wat die lostrio tot dusver die seisoen kortgekom het.

Volgens Ross Cronjé, wat vir die eerste keer vanjaar in die nr. 9-trui sal speel, is dié 20-jarige nie iemand wat jy graag op jou wil sien afstorm nie.

“Hy het al ’n keer of wat in my rigting gehardloop en dis nie maklik om hom grond toe te bring nie,” het Cronjé van Tshituka gesê.

“Ons moet hierdie naweek oor die voordeellyn kom en as ons Vincent reg inspan, kan hy presies daardie rol vir ons vertolk.”

Andries Coetzee, Sylvian Mahuza, Wandisile Simelane, Franco Naudé, Courtnall Skosan, Elton Jantjies, Ross Cronjé, Kwagga Smith, Vincent Tshituka, Marnus Schoeman, Rhyno Herbst, Ruan Vermaak, Carlü Sadie, Malcolm Marx, Dylan Smith. PLAASVERVANGERS: Pieter Jansen, Nathan McBeth, Frans van Wyk, Stephan Lewies, James Venter, Dillon Smit, Harold Vorster, Gianni Lombard/Tyrone Green.